Kato'ba 1

1:1 Kana-kana niaka lalang ri anne kittaka, assala’na iamintu battu ri se’rea Tau Assarea Pangngajarang, ana’ bura’nena Daud, ansambeangai Daud a’jari karaeng ri Yerusalem.
1:2 Nakana anjo lapung Tau Assarea Pangngajarang: Yangasenna poro sia-sia siagang tena matu-matunna! Tena bua’-bua’na anjo tallasaka, tena ngaseng anggaranna.
1:3 Anjamaya tojengki’ lalang tallasatta, ammatti’-matti’ songotta. Mingka, apa nigappa akkullea nikalompoang pa’mai’?
1:4 Ammumbai sossorang se’rea na lanynya’ sossorang maraenga, mingka linoa tuli kammana.
1:5 Alloa tuli ammumbana siagang tuli labuna. Posomi ammotere’ mange ri tampa’na riolo, nampa ammumba poleang.
1:6 Anging ammiri’ a’lampa timboro’, nampa ammiri’ a’lampa wara’; amminro-minroi, nampa ammotere’ pole.
1:7 Yangaseng binangaya a’lo’loroki mange ri tamparang, mingka tena rassina tamparanga. Ammotereki je’ne’na mange ri ulunna binangaya, nampa a’lo’loro’ pole.
1:8 Yangasenna appakalanre, siagang appakalanre tena anjorenganna. Tena bassoro’na matanta accini’; tena sukku’na tolinta allangngere’.
1:9 Apa le’baka kajariang, lakajariang poleangi. Apa le’baka nigaukang, lanigaukangi pole. Tena apa-apa akkulle nikana beru ri anne linoa.
1:10 Nia’ tau nakana, ‘Ciniki, anne anu beru!’ Mingka, anjo anu nia’ memammo ri tenanapa nilassukangki’.
1:11 Talanau’rangiai taua apa kajarianga ri rewasa’ allaloa. Kamma tomminjo kajariang ri kamma-kammaya anne siagang lakajarianga sallang, tena nalaniu’rangi ri tau labattua sallang.
1:12 Inakke, Tau Assarea Pangngajarang, ammarenta’ a’jari karaeng ri Yerusalem mae ri tu Israel.
1:13 Attojeng-tojenga’ ero’ ansalidiki siagang ampappilajari siagang baji’ sikontu apa kajarianga ri anne linoa. Sare le’baka Napasadia Allata’ala untu’ ikatte teai sipato’ appakasi’nana pa’mai’.
1:14 Kucini’ ngasemmi sikontu panggaukanna taua ri anne linoa. Patappa’mi, angkanaya yangasenna anjo sia-siaji, sanrapang tau angngondanga anging.
1:15 Apa a’jekkoa takkulleai nilambusi, na apa tenaya takkulleai nirekeng.
1:16 Kupikkiriki angkana, “Inakke anne a’jari tau niparalluanga’ siagang tau cara’deka’; bella cara’dekku na sikontu tau le’baka ammarenta ri Yerusalem rioloangangku. Appasse’rea’ jai pangngassengang siagang kacara’dekang.”
1:17 Jari attojeng-tojemma’ ero’ angngassengi passisalanna nikanaya pangngassengang siagang kadongokang, nikanaya kacara’dekang siagang katoloang. Mingka a’nassami angkanaya inakke anne sanrapanga’ poro tau angngondanga anging.
1:18 Nasaba’ pila’ jai kacara’dekanta, pila’ jai tongi kasusanta.

Kato'ba 2

2:1 Kutantuammi ero’ ampakasannang mami kalengku, sollanna kuasseng nikanaya kate’neang. Mingka ma’nassa sia-sia tonji anjo kammaya.
2:2 Kuassemmi angkanaya anjo kakkalaka kadongokang, na anjo kasannangnganga tena matu-matunna.
2:3 Lanri ero’ duduku a’jari tau cara’de’, attojeng-tojemma’ ero’ assannang-sannang, iamintu angnginunga tojeng anggoro’ siagang assua’-suaraka tojeng. Kukapangi angkana iami anjo cara kaminang baji’ mae ri rupataua untu’ angkasiaki nyamanna tallasa’na ri lino sinampeka anne.
2:4-5 Sikamma jama-jamang lompoa le’ba’mi kugaukang. Ambangunga’ siapa jaina balla’ untu’ kalengku. Appareka’ pa’lamung-lamungang bunga siagang koko-koko kulamungia poko’ anggoro’ siagang sangka’ rupa poko’ rappo-rappoang.
2:6 Angngekea’ kollang untu’ a’jari je’ne’ panai’ mae ri anjo pa’lamung-lamunganga siagang koko-kokoa.
2:7 Jai atangku, baji’ nakuballia, kammayatompa ia lassuka lalang ballakku. Olo’-olo’ piaraku bella jaina na olo’-olo’ piarana sikontu tau le’baka ammantang ri Yerusalem.
2:8 Appasse’rea’ pera’ siagang bulaeng, iamintu battua ri passarena sikamma karaeng bansa maraeng kuparentaya. Pakelong bura’ne siagang pakelong baine akkelong-kelongi untu’ ampakasannangi nyawaku. Nia’ baine piaraku sa’genna siapa kukaerokia.
2:9 Tojenga’, inakkemi kaminang malompo ri sikamma le’baka ammantang ri Yerusalem, siagang tena anrateangngangi kacara’dekangku.
2:10 Sikontu kukaerokia, kupassukkuki. Tale’bakai kutahang kalengku untu’ angkasiaki kasannangngang manna antekammaya. Lompoi pa’maikku mae ri sikamma wassele’ posoku, siagang iami anjo sawalakku.
2:11 Mingka ri boko kupilajari sikontu bate parekku, kammayatompa sikontu kaposoangku untu’ ampa’le’baki anjo apa kupareka, kuassemmi angkanaya yangasenna anjo tena anggaranna. Anjo usahaku poro sia-siaji bawang, sanrapang tau angngondanga anging.
2:12 Manna antekamma, apa akkullea nagaukang se’rea karaeng, iaji bawang apa le’baka nagaukang sikamma karaeng rioloangannaya. Nampa appakkaramulama’ appikkiri’ angkana: Apa battuanna nikanaya a’jari cara’de’, yareka dongo’ yareka tolo?
2:13 Memang kuassengi, “La’bi bajikangngangi kacara’dekanga na katoloanga, rapang singaraka la’bi bajikangngangi na sassanga.
2:14 Tau cara’deka akkullei nacini’ oloang lanatujua; tao toloa rapang angngosalaki ri pa’jappanna.” Mingka kuasseng tongi angkanaya sangkammaji sare lanagappaya ngaseng ke’nanga.
2:15 Jari kupikkiriki angkana, ‘Sare antujuai tau toloa lanatuju tonga”. Jari, apa matu-matunna kacara’dekangku? Nampa kualle bodona kanaya, na kukana, anjo kacara’dekanga memang tena sikali matu-matunna.
2:16 Tau toloa lalintaki nikaluppai, mingka manna tau cara’deka tena todong nalaniu’rangi. Pila’ mange allo pila’ lanipela’ ngasengki’ ri pangngu’rangi. Ikatte musti mate ngasengki’, baji’ tau cara’de’ kammayatompa tau dongoka.
2:17 Lanri kammana, anjo tallasaka tena anggaranna mae ri nakke, tena maraeng. Yangasenna sia-siaji bawang; poro angngondangkuji bawang anging.
2:18 Sikontu wassele’ jama-jamangku siagang panggappangku tena matu-matunna mae ri nakke, lanri musti kubokoi untu’ tau ansambeangia’.
2:19 Nampa inai akkulle angngassengi angkanaya cara’deki yareka toloi kalenna? Mingka manna antekamma iami lampatangi sikamma wassele’ usahaku, ia kugappaya lalang tallasakku ri anne linoa, lanri akkaresoku siagang lanri kacara’dekangku. Jari, anjo sia-sia tonji.
2:20 Kamma-kamma anne assesse’ lalamma’ lanri akkareso duduku.
2:21 Nasaba’ punna akkareso dudu taua napakei sikontu kacara’dekanga, pangngassenganga kammayatompa kaporeanna untu’ anggappai apa nakaerokia. Mingka kale’bakkanna musti nabokoi anjo sikontu wassele’ kaposoanna untu’ tau tenaya nammatti’ songo’na mae ri anjo apa-apaya. Jari anjo sia-sia tonji, nampa pole tena naadele’!
2:22 Lalang sikontu umuru’ katallassanna rupataua anjama battalaki siagang assusa-susai; nampa kemae wassele’ kaposoanna akkullea nakalompoang pa’mai’!
2:23 Manna apa mamo le’ba’ nagaukang lalang tallasa’na, angngerangi sessa siagang pa’risi’ pa’mai’ mae ri kalenna. Manna ri wattu bangngia lussa’ tonji pa’mai’na. Jari, yangasenna anjo, poro sia-siaji bawang.
2:24 Tenamo bajikangngang mae ri rupataua nikanaya angnganre, angnginung siagang angkasiaki wassele’ jama-jamanna. Kuassengi angkanaya anjo lagi napassareNaji bawang Allata’ala.
2:25 Inaika akkulle angnganre siagang assannang-sannang punna teai Allata’ala.
2:26 Allata’ala assare kacara’dekang, pangngassengang siagang kate’neang mae ri tau ampakasannangai pa’mai’Na. Mingka tau dorakaya Nasuroi a’boya dalle’ nampa napatambung wassele’na untu’ nipassareang mae ri tau ampakasannangai pa’mai’Na Allata’ala. Jari yangasenna anjo sia-siaji, sanrapang usaha angngondang anging.

Kato'ba 3

3:1 Sikontu apa-apaya ri anne linoa kajariangi situru’ wattu Napattantua Allata’ala.
3:2 Allata’ala ampattantui wattu allassukanga siagang wattu kamateanga, wattu untu’ a’lamung siagang wattu untu’ ammi’bu’,
3:3 wattu untu’ ammuno siagang wattu untu’ appamolle, wattu untu’ anrumbang siagang wattu untu’ ambangung.
3:4 Allata’ala ampattantui wattu untu’ angngarru’ siagang wattu untu’ ammakkala’, wattu untu’ appiraung siagang wattu untu’ a’joge’,
3:5 wattu untu’ assikatinroang siagang wattu niparrangngi kalea, wattu untu’ anraka’ siagang wattu nitahang kalenta.
3:6 Allata’ala ampattantui wattu anggappaya siagang wattu kapelakkanga, wattu ammoli’ siagang wattu a’labo,
3:7 wattu untu’ angngekke’ siagang wattu untu’ anjai’ wattu untu’ a’mereki siagang wattu untu’ a’bicara.
3:8 Allata’ala ampattantui wattu untu’ mangngamaseang siagang wattu untu’ mangngabirisi, wattu untu’ a’bundu’ siagang wattu untu’ assiama’.
3:9 Apa wassele’na sikontu kaposoanta?
3:10 Kuassengi angkanaya Allata’ala assareki’ erangngang battala’.
3:11 Ia ampattantui wattu kaminang cocoka untu’ sikontu apa-apaya. Ia assareki’ kaerokang untu’ angngassengi allo lanidallekanga, mingka tanikulleai ampahangi gau’Na Allata’ala battu ri pakaramulanna sa’genna kala’busang.
3:12 Kuassengi angkanaya untu’ ikatte, tenamo bajikangngang nikanaya a’rannu-rannu siagang nipikasiakki tallasaka lalang siapa jaina umurutta.
3:13 Bajikangngangi angnganre ngasengki’ siagang angnginung kammayatompa nipikasiakki wassele’ jama-jamanta. Anjo passareNa ngaseng Allata’ala.
3:14 Kuassengi angkanaya sikontu bate pare’Na Allata’ala, latuli nia’na satunggu-tungguna. Takkulleai rupataua antambai yareka angkurangngi. Siagang nakamma anjo gau’Na Allata’ala, sollanta malla’ mae ri Ia.
3:15 Apa kajarianga kamma-kamma anne, anu le’ba’ memammo kajariang riolo. Apa laniaka, anu sallomo nia’na. Allata’ala ampattantui, sollanna apa le’baka kajariang, kajariang poleangi.
3:16 Nia’ pole kucini’ ri anne linoa: kemae mustina nia’ kaadelang siagang kabajikang, anjoremmi nia’ kaja’dallang.
3:17 Kupikkiriki angkana, laNaadeli Allata’ala tau bajika siagang tau kodia, nasaba’ tunggala’ passala’ siagang tunggala’ panggaukang, lakajariangi situru’ wattu Napattantua Allata’ala.
3:18 Bodona kana iamintu: Naujiki’ Allata’ala untu’ ampappicinikangi angkanaya anjo sarenta tena sisalana siagang sarenna olo’-oloka.
3:19 Manna antekamma, anjo sarenna rupataua siagang olo’-oloka sirupaji. Se’rea lamatei, maraengannaya kamma todong. Rua-ruana sangkamma, iamintu apa attallasa’. Jari, tena nala’bi upa’ rupataua na olo’-oloka, saba’ para sia-siaji anjo tallasaka mae ri ia.
3:20 Sangkammaji tampa’ lanatujua ke’nanga. Assala’na ke’nanga iamintu limbu’bu siagang lammotereki mae ri limbu’buka.
3:21 Tena niassengi, angkanaya apaka anjo nyawana rupataua a’lampa naiki nampa nyawana olo’-oloka naungi ri buttaya.
3:22 Jari kuassemmi angkanaya la’bi bajikangngangi punna napikasiakki rupataua wassele’ jama-jamanna. Pantaranganna anjo tena lakkulle nagaukang. Tena olona akkulle naasseng apa lakajariang punna matemi.